میں کل فرنیچر والی دکان پر گیا کچھ صوفہ اور بیڈ سیٹ پسند آئے تو سوچا تصویر لے لیتا ھُوں گھر والوں کو دِکھانے واسطے.. تصویر لینے لگا تو دکاندار غصہ ھو گیا اور منع کر دیا.. وہاں سے نکلا اور جس بھی فرنیچر والے کے پاس گیا اُس نے ایسا ھی کِیا.. میرے ساتھ ایسا ھی پہلے ایک دفعہ کپڑے کے بوتیک پر بھی ھُوا تھا کہ جس بھی بوتیک پر گیا اُنہوں نے کپڑوں کی تصاویر لینے سے منع کر دیا.. میں نے فرنیچر والے سے وجہ پوچھی تو کہنے لگا لوگ ڈیزائن چوری کر لیتے ہیں.. کہنے لگا: میں پہلے سنیار کا کام بھی کرتا رھا ھُوں اور جب کبھی ہم اپنے اُستاد سے مِلنے جاتے تھے تو وہ اپنا کام بند کر کے چُھپا لیتے تھے تا کہ ہم دیکھ کے اُسکا ڈیزائن چوری نہ کر لیں.. یہی دنیا کا دستور ھے جناب….
مجھے اِس پر ایک واقعہ یاد آ گیا اور میں نے فرنیچر والے کو سُنایا:
ہمارے میاں چنوں شہر میں خوشی برفی والا بہت مشہور ھے.. بہت دُور دُور سے لوگ اُسکی برفی لینے آتے ہیں کیونکہ اُسکی برفی میں ذائقہ ھی ایسا ھے کہ میٹھے سے نفرت کرنے والا بھی بہت شوق سے اُسکی برفی کھاتا ھے.. ایک دفعہ لاہور میں کسی شادی پر امریکہ سے کچھ لوگ آئے ھُوئے تھے وہ تھے تو پاکستانی لاہوری لیکن بعد میں امریکہ شفٹ ھو گئے تھے تو وہاں شادی پر کوئی بندہ خوشی کی برفی لے گیا.. امریکی مہمانوں نے جب برفی کھائی تو حیران رہ گئے، کہتے: ایسا ذائقہ ہم نے آج تک نہیں چکھا کسی مٹھائی کا.. وہ خوشی کی برفی کے ایسے دیوانے ھُوئے کہ مزید برفی لینے میاں چنوں پہنچ گئے لیکن معلوم ہوا کہ برفی ختم ھو گئی کیونکہ فجر کی نماز کے بعد سے صبح آٹھ نو بجے تک اُس کی جتنی بھی سات آٹھ من برفی ھوتی تھی ساری بِک جاتی تھی اور شام بھی عصر سے عشاء تک یہی حال ھوتا تھا.. وہ امریکی اِتنی زیادہ آمدن دیکھ کر حیران ھو گئے اور خوشی سے کہنے لگے: ہمیں اپنی برفی کی ریسیپی دے دو ہم بھی واپس امریکہ جا کے مٹھائی کا کاروبار کریں گے وہاں بہت چلے گی تمہاری برفی گورے بہت پسند کریں گے..
خوشی نے ریسیپی لکھوائی اُنکو پکڑائی اور پھر بولا
«جناب آپ نے خوشی کی ریسیپی تو لے لی لیکن خوشی جیسا نصیب کہاں سے لاؤ گے..؟»
تو میں نے اُس فرنیچر والے کو سمجھایا کہ میرے بھائی یہ حرکت اور اِس جیسی مختلف اوچھی حرکتیں جو آپ سمیت اکثر کاروباری حضرات آج کل کر رھے ہیں یہ حسد کی ایک ایسی قِسم ھے جسکو ہم حسد نہیں مانتے لیکن درحقیقت یہ خالصتاً حسد ھی ھے اور یہی حسد ہمارے اکثر کاروباری حضرات کو ہر وقت بےسکون کیئے رکھتا ھے..
